برأيـــك >>> لماذا خسرنا أمام الكويت

[HasSaN]

بسم الله الرحمن الرحيم

بالبداية هاردلك لكل السوريين خسارتنا المفجعة امام الممنتخب الكويتي

جميعنا شاهد المباراة و اكيد كل شخص سجل بذاكرته ملاحظات حول المنتخب و أداؤه واسباب خسارته

طبعاً من وجهة نظر كل شخص حابين نسمع نقد الجميع وانا سأتكلم من بعدكم سأترك لكم الكلمة و أعيد طرح السؤال ,,,

لماذا خسرنا بهذا الشكل الفظيع اما المنتخب الكويتي الشقيق

[henry]

للاسف كون انا اول شخص بيرد
لاني بصراحة ما تفرجت ع المباراة
وكنت عم اتفرج على سباق كندا

[SimpleMan]

السلام عليكم

كل لعبة إلها ظروفها وما بتعرف شو نفسية اللعيبة كانت

أنا بعتبر الحظ هو العامل الأساسي..... في لعيبة خبصو باللعب ... وفي لعيبة كانو ممتازين .. وفي لعيبة ما بينو بنووب


وبيبقى التوفيق من رب العالمين " وعسى أن تكرهو شيأ وهو خيرا لكم "


كلو لخير يا شباب


سلاااااااااااامات

[henry]

صحيح انا رغم انو ما تابعت المباراة بس العامل النفسي بيلعب دور مهم

[هنو]

خسرنا لانو ابو شاكر خبص كتيييييييييييييييييييييييييييييييييييير

الله يسامحو

[ronaldo-9]

خسرنا لأسباب مابتوقع بيكفيها يوم من الحكي بس رح حاول اختصر:
أبو شاكر طبعا سبب رئيسي من خلال التشكيل اللي بدأ فيه المباراة وقراءة المباراة الخاطئة وعلى عكس العادة يعني ببساطة لما انتها الشوط الأول تعادل تفاءلت لأني بوثق بأبو شاكر بس للأسف خيب ظننا .
ثم من أهم النقط اللي بتتسجل على أبو شاكر انه جاب لاعب الكرامة أنس الخوجا ,عذرا للتسمية ومع اني بكره هالشي كتير بس مافيني اسكت ,يعني ببساطة كيف راحت عن بال أبو شاكر ان دفاع الكرامة بلاعبيه المحليين مجموعة من اللاعبين السيئين وخاصة بالتغطية الدفاعية ولكن تعملق فابيو الغير طبيعي عم يغطي على كل أخطاؤهم وبالعلامة الأخطاء اللي عملها انس مبارح أخطاء ولد مبتدئ بكرة القدم.
كمان اللاعبين مسيك من مصعب بلحوس اللي ببساطة بتعرف انه ماتسددت تسديدة على مرمانا وكانت قوية الا وتسجلت وبيتحمل الأهداف الأول والتاني والرابع .
سنحاريب ملكي النجم الساحر اللي كنا كتير متأملين فيه ضيع فرصة كانت رح ترجعنا للمباراة ,عادة مابحكي عن الفرص الضائعة بس بالفعل لما تكون الفرصة من موديل الفرص اللي بتنعرض كطرائف رياضية من اللاعب لازم نحكي عليها .
الحكم .................................................. .................................................. ................
.................................................. .................................................. .......................
عذرا على النقط بس بترعفوا شو المقصود فيها ,يعني ببساطة هالحكم لازمله شهادة دوليه تنربط برقبته وتتعلق ويحطوله فيها جرس منشان كل ماحرك راسه والسبب انه اخترع حالة جديدة بكرة القدم وحسب تسلل على منتخبنا من ركلة تماس بالإضافة للخطأ اللي احتسبه بالهدف الرابع بعد قطعة رائعة من رأفت محمد وكمان المسخرة اللي صارت لما طرد حارس المرمى وهو عم يطالب كابتن الكويت بإنه يترك الملعب ووقتها لاعبي الكويت ضيعوا 8 دقائق لوحدها كانت بوقت منتخبنا قادر يرجع عاللعبة .

بتوقع فرصة التأهل طارت من ايدينا لأنها تحولت لمية وإيدينا كانت ممدودة كتيييير وماكنا نحاول نتمسك فيها والسبب ببساطة اننا رح نخسر من إيران على أرضنا ورح نخسر من الإمارات بالإمارات

[shumi]

السلام عليكم شباب

متل ما قال رونالدو الحكي كتير وما بدنا نخلص اليوم

بس الي عتب واحد على رونالدو انو حمل البلحوس مسؤولية الاهداف

الهدف الاول اجا من انفرادة تامة مع الحارس

والتاني من سوء التغطية الدفاعية

والتالت من عنا

وبايدك بالهدف الرابع بس والبلجوس ما بيتحمل مسؤولية الهدف كامل

لانو كان امامه 3 من مدافعينا الاشاوس:D

قاتلنا كتير مشان نلعب المحترفين بلعبة الكويت عنا بسوريا

ولما اجو المحترفين بقيو عالخط

مع اني كرماوي الهوى

بس بعتقد انو ابو شاكر بيتحول الجزء الكبر من المسوليية

رح بلش من خط الدفاع وما رح سمي اسماء ابدا

خط الدفاع كان فارط على الاخر

وكنت اتمنى انو يشارك الدكة بالشوط التاني

وبحب اعترف بشغلة انو من وقت اصابة صخرة دفاعنا خالد البابا

دفاعنافاشل لهلق

خط الوسط مش ولا بد

وافضل لاعب كان فيه برايي عادل عبد الله


والباقي عال؟؟؟؟؟؟؟؟؟؟؟؟؟؟؟؟:eek:

اما خط الهجوم كان لازم يكون غير هيك من حيث اسامي لاللاعبين

فراس الخطيب كان جيد جدا بس في بعض الاحيان عابته الانانية

بعد التعادل بالشوط الاول كان على منتخبنا انو يهاجم ليخلي المنتخب الكويتي بملعبو

وتصورو انو لاعب الكويت وليد علي جمعة اللي نزل بديل

من تاني كرة بيلمسها سجل الكويت الهدف التالت


بقدم دفاعنا


اداء المنتخب ككل دون المستوي

ولنا عودة ان شاء الله

[henry]

ياشباب انا قلت
ليش مو اخد من تشرين لاعبين؟
استغربت
يعني لا يا خد الصالح
ولا ياخد الشباب الرائعين بالفريق
بس الدكة
اللي عم تجيه عروض احتراف
معتز؟
لك الحارس
الشاب


شو كان اسمو
اي اي
المدنية
بيسوى الف حارس من ال
خلص ما بدنا نسئ لحدا
بس عتبي الوحيد
انو مافي لاعبين لا من تشرين ولا من الساحل
رغم اني ما بعرف التشكيلة اللي كانت وعم احكي هيك
بس شفت وقتها التشكيلة اللي لعب فيها قبل المبارايات الرسمية
وما شفت الاسماء اللي بدي اياها
على كل لسى ما صار شي
بعد في امل بعتقد
بدو يتاهل 2 مو هيكي شباب;)

[shumi]

هلق في كتير لاعبين بيستحقو يكونو بالمنتخب ومو موجودين

معتز كيلوني واديب بركات و وائل عيان وغيرهم كتير

بس هي القائمة من اختيار اتحاد الفطبول المبجل قبل ما يستلم ابو شاكر

[henry]

لا ما تدافع عنو
هوي اللي اختار مدري كام الف لاعب ونقى منهن هالفطاحل

[SimpleMan]

السلام عليكم

سيد هنري خلصت ...... باين إنو أبوشاكر مدايقك كتير والله .......... بتعرف إنو أنت أكتر واحد لازم يكون بالتشكيلة الأساسية ........ بس يا أخي شو بدك تعمل حظك إنك تحكي وبس .... وأبو شاكر ما كان منتبه لوجود لا عب خطير متلك ........شو بدك تعمل يلعن أخت هالزمان


بعدين حبيبي جمهورنا أول ما بيحكم بيحكم على المدرب .... تقول إلون شي تار معو ... وجمهورنا بيفهم بالتدريب والطب والتحكيم وبكل شي الحمد لله



هوي اللي اختار مدري كام الف لاعب ونقى منهن هالفطاحل


صحي صحي كمان نسيت قلك إنو لازم تكون أنت مدرب بس بتعرف متل ما قلت لك يلعن أخت هالحظ .... لاتزعل كلو نصيب معك معك بتصير مدرب

[HasSaN]

السلام عليكم

سيد هنري خلصت ...... باين إنو أبوشاكر مدايقك كتير والله .......... بتعرف إنو أنت أكتر واحد لازم يكون بالتشكيلة الأساسية ........ بس يا أخي شو بدك تعمل حظك إنك تحكي وبس .... وأبو شاكر ما كان منتبه لوجود لا عب خطير متلك ........شو بدك تعمل يلعن أخت هالزمان


بعدين حبيبي جمهورنا أول ما بيحكم بيحكم على المدرب .... تقول إلون شي تار معو ... وجمهورنا بيفهم بالتدريب والطب والتحكيم وبكل شي الحمد لله



هوي اللي اختار مدري كام الف لاعب ونقى منهن هالفطاحل


صحي صحي كمان نسيت قلك إنو لازم تكون أنت مدرب بس بتعرف متل ما قلت لك يلعن أخت هالحظ .... لاتزعل كلو نصيب معك معك بتصير مدرب




حبيبنا وسام بعتقد هنري عم يبدي رأيه الشخصي متل غيره من الأعضاء وهاد حق له و هاد شعار منتدانا الحرية ضمن الأًصول وبتوقع هنري ما طلع عنها فهو حمل المسؤولية من وجهة نظره للمدرب
وانا من وجهة نظري بحمل المسؤولية لعدد من اللاعبين اولهم الحارس و الدفاع ....

[henry]

تقبر قلبي يا وسام
حااسس متل كانو حدا مصلتك عليي وبدك تطفشني من المنتدى
اولا تقبرني انا بدي تعرف شغلة انو انا اذا كيمي رايكونن بيتزلج على منحدرات احدى جبال الالب
اني شوفو افضل من اني شوف منتخب سوري
بدي تعرف انو انا اكتر شخص بيكون مع المدرب وبحترم كافة قراراتو لانو بالنهاية هوي اللي رح يتسطر الامجاد باسمو
بدي تعرف انو انا ما تابعت ولا مباراة لسورية بالتصفيات
بدي تعرف انو انا حمصي يعني لازم حبو لابو شاكر
بدي تعرف انو انا لا امت بصلة لا من قريب ولا من بعيد للرياضة السورية
بس هيك وقت بلاقي حالي فاضي بتابع رياضة سورية

وانا لما كنت عم احكي عن اختيارات المدرب
كان معي حق
لانو لو كان مستدعي معتز كيلوني
كان قدر يبدل جهاد وينزل معتز بما انو جهاد ما لعب منيح

حسب التقرير اللي قريتو

انا ما بتفرق معي مين ما جاب يجيب
بس انا عم ساير ونكت على شومي وعصبو شوي
بس انت طالعلي بالسحبة وجاي على بالك تعلق معي
ما تفكر اني متدايق
والله العظيم لا وهي سيكارة لاني مروق
على اعتبار اني ما بشرب سواكير غير اذا كنت مروق
واهلا وسهلا فيك مرة تانية
وويلكم فيك وباللي دلك ع المنتدى وسلملي عليه اذا عم تشوفو

[ronaldo-9]

شومي انا بحترم رأيك كتير بس لساتني بخالفك وخاصة من ناحية الهدف الأول لأن الهدف تسجل من كرة مرفوعة من نص الملعب وكانت قريبة من مصعب وبالعلامة كل المحللين اللي تابعتهم قالوا الحق على الحارس أولا والدفاع تانيا .
خلونا نطوي صفحة الكويت (مع اني سمعت انه فيه احتمال لإعادتها) ,ونروح للمباراة الصعبة جدا جدا جدا القادمة مباراة إيران ووين على أرضنا ,أنا ببساطة ماعندي أكتر من 5% تفاءل بفوزننا و5% تعادل و90% فوز إيران .

[HasSaN]

شومي انا بحترم رأيك كتير بس لساتني بخالفك وخاصة من ناحية الهدف الأول لأن الهدف تسجل من كرة مرفوعة من نص الملعب وكانت قريبة من مصعب وبالعلامة كل المحللين اللي تابعتهم قالوا الحق على الحارس أولا والدفاع تانيا .
خلونا نطوي صفحة الكويت (مع اني سمعت انه فيه احتمال لإعادتها) ,ونروح للمباراة الصعبة جدا جدا جدا القادمة مباراة إيران ووين على أرضنا ,أنا ببساطة ماعندي أكتر من 5% تفاءل بفوزننا و5% تعادل و90% فوز إيران .

و انا معك حسن اكيد بكل كلمة قلتها و بخصو لعبتنا مع ايران انا متفائل بالتعادل بس مو اكتر

[shumi]

عادي حسون انا ما عم لومك على رايك

مجرد وجهة نظر مو اكتر


وبالتوفيق للمنتخب:o

[henry]

اي الله يوقفهن
بس انا بخالفكن بالتفائل
يعني المنتخب الايراني ما عاد هالمنتخب المرعب
والمنتخب السوري صار الو شوية هيبة بين الفرق
انا برجح كل الاحتمالات
وفوز سوريا اقرب
وتاني احتمال الخسارة بفارق كبير :d

[crespo]

2 × 0 لايران

[henry]

هون التفاؤل;)

[crespo]

مبينة :(

[ابو انس]

لازم ننسى الماضي ونشجع منتخبنا مع ايران

[crespo]

اي انشاء الله نربح مع انو بستبعد هالشي

[ابو انس]

اي انشاء الله نربح مع انو بستبعد هالشي
انا بتوقع وبتامل نفوز

[Totti]

يا جماعة ببساطة خسرنا مع الكويت بسبب غياب خط الدفاع ...

بعهالمباراة بالذات ما كنا عنا شي اسمو خط دفاع ... بالاضافة لأنو البلحوس ما كان موفق بنوب ... و الغول التالت اللي أكلناه بالغلط من المدافع أثر كتير عالمباراة و دفع لاعبينا للاستسلام ...

وعلى كل المباراة راحت .. و الأمل انشالله اليوم و التعويض ...

انا متفائل اليوم بفوز منتخبنا ... و فعلا متل ما قال ابو حميد ... ايران ما عادت متل أول ... وسوريا مو متل أول ... و اليوم انشالله أكيد رح يبيضولنا وجهنا الشباب ...

[crespo]

شفتوا متل ما قلت بالصفحة اللي قبل هي رح نخسر 2 × 0

[Totti]

بما انو توقعاتك مشي حالهابالمباراة الماضية شفلي بالله شو بدو يصير فينا بالمباراة الجاية مع الامارات !!

[crespo]

والله يا غالي رح نفوز بس للاسف ما رح نتأهل