هذا ما حصل على مدرجات العباسيين

[هنو]

مبارح الله لا يتوهلنا رأي

حملت حالي و انجريت ع الملعب قال شو بدي شجع منتخبنا الكروي الرائع المتألق

و الله العظيم رايح و مافي بقلبي ولا ذرة تفاؤل ( بعكس لعبة الكويت ذهاباً )

وصلت ولقيت مظهر حضاري ( كما تصفه الصحف ) الجمهور السوري بكافة ألوانه مشجعاً للمنتخب

بس كان في شي ملاحظ انو ع يسار المنصة تواجدت رابطة مشجعي الكرامة

و بلشت المباراة و كل الجمهور متفائل بالمنتخب

بس كمان كل العالم كانت متفاجأة من وجود البلحوس ( يلي خبص بلعبة الكويت لحتى شبع تخبيص )

2 وجود الشعبو !!!!!!!!!!!!!!!!!!!!!!!!! و هو الذي لم يفعل شيء بلعبة الكويت

3 وجدو المعنتظ الجنيات !!!!!!!!!!!!!!!!!!!!


المهم :

بالشوط التاني أيقن الجمهور انو المنتخب مافي منو أمل ولا بليرة

صار جمهور المنصة ينادي شو ساويت أبو شاكر شو ساويت ( بس هي دليل مسخرة مو حبية )

فجن جنون جمهور الكرامة المتواجد و بدأ بالدفاع عن مدربه بالقول ارفع ايدك أبو شاكر


فعاد الجمهور البرتقالي منادياً بالسيد ( و هو حق لجمهور دمشق أن يرا لاعب ممتاز يمثل العاصمة
و هو الاعب الافضل من الكثير المتواجدين مكانه ) نزل السيد نزل السيد

و هنا بدأت الموشحات بين جمهور الكرة السورية المتواجد ( عدا جمهور الكرامة ) و بين جمهور الكرامة

مرة ح تخسر كرامة

وتارة قول الله كرامة

و بالحالتين هناك رسالة أظن أنها وصلت

و عند دخول الهدف الثاني و القاضي بدأت الجماهير بالفرح و المرح و كأن الهدف دخل لنا
( و الشباب المعتادة عاى أجواء الملاعب تدرك معنى هذه الحركة من الجمهور الذي نادا ايران ايران )


نعم لقد تركنا منتخبا البائس التعيس و شجعنا المنتخب الايراني

الذي كان و سيبقى و رغم مشاكله عقدة لنا


و الله يرحم ايامك يا فجر ابراهيم و خلي الاعلام الرياضي السوري يفرح بابو شاكر

[هنو]

بس أحلى شي باللعبة
لما كل الجمهور المتواجد نادا

وحداوية

[ابو انس]

صرنا مسخرة

[semo]

كل هالمسخرة كوم
وانك رحت حضرت المباراة كوم
شو اخدك....... (متل ما قلت الله لا يتوهلنا رأي) :confused::confused:

[shumi]

بدون تعليق

لانك مرة تانية عم تقصد لاعبي الكرامة بموضوعك

[هنو]

بدون تعليق



لانك مرة تانية عم تقصد لاعبي الكرامة بموضوعك



ليش أداءون مع النادي يختلف عن اداءون مع المنتخب ؟؟؟؟؟؟؟؟؟؟؟؟؟؟؟؟؟؟؟؟؟

الله العليم يمكن مشان المكافآت

[HasSaN]

المنتخب ظهر بمظهر البائس وبدون تعليق خر يكفينا مهازل

[shumi]

معليش اخي الكريم انت كل كلامك اللي كتبتو هلق وقبل

كلو لانو ما اخدو ماهر السيد على المنتخب

وعلى كل حال احكي اللي بدك ياه ما رح رد عليك ابدا


ومتل ما قلتت من قبل بتمنى انو يستبعدو لاعبين الكرامة ن المنتخب

وهيك بيصير في 5 شواغر بالمنتخب

وساعتها ممكن انو انت تستدعي الاعبين اللي حابب انو يكونو بالمنتخب

[هنو]

لاء يا حبيبي

في كم لاعب بالكرامة لازم يكونوا بالمنتخب بس بالمقابل في كم واحد حرام يلمسوا الطابة بالمنتخب

[Totti]

يا جماعة .. و الله التشكيلة ممتازة كانت مبارح .. وخصوصي انو انس الخوجا ما لعب مبارح ...

اما بالنسبة لعاطف .. فيا جماعة .. مع انو هابني آدم أناني وبيحب يشوط كتير ومالو علاقة باللعب ... بس عطيني جناح بسوريا متلو ..!! مين بدك يجي مكانو ..!! ما عنا بديل الو ... و اللي رح يجي مكانو ما رح يكون أفضل منو ... و فعلا هو عليه تجحيشات كتير بالمباراة .. بس هاد ما بيمنع انو لاعب سريع وبيشغل الدفاع كتير ...

و بالنسبة لبقية لاعبين الكرامة ... فهاد شي طبيعي انو يكونو بالمنتخب ... يعني فريق متل الكرامة ... وصيف بطل اسيا و متصدر الدوري السوري و بطل سوريا .. يعني معقول مستكترين انو يكون خمسة من لاعبينو بالمنتخب ...!!!!

[shumi]

ابو التوت اهلين وسهلين

اي هنو مدام في لعيبة بيستلهلو يكونو بالمنتخب من الكرامة

لو سمحت يعني فيك تقلي مين هني

وفيك تقلي مين ما بيستاهل يكون بالمنتخب من الكرامة

[ابو انس]

ياشباب والله ابو شاكر منيح وهو انسان محترم واذا بدنا نحكي الحق هو افضل مدرب بسوريا بس ابو شاكر كان الو اغلاط بمباراة الكويت بس بايران هو ماغلط لانو المنتخب كلو كان صفر ولو بدل كل اللاعبين مارح يستفيد لانو المستوى كان هابط من اللاعبين وابو شاكر شو بدو يعمل اذا كل اللاعبين كانو هيك
وانتا برايي انو ابو شاكر ورط حالو لانو لو كنت محلو مااقبل استلم المنتخب لانو لسه الجو مانو نضيف وبدو كتييير تاينضف

[7ayatona]

وانا معك بهالرأي
أبو شاكر مافي منو و الله أحسن مدرب عنا بسوريا بس مثل ما قلت انو الجو هاد مو جو
وانا لو كنت محلو ما كنت رضيت درب المنتخب
لأنو ضر بسمعته لابو شاكر

[ابو انس]

وانا معك بهالرأي
أبو شاكر مافي منو و الله أحسن مدرب عنا بسوريا بس مثل ما قلت انو الجو هاد مو جو
وانا لو كنت محلو ما كنت رضيت درب المنتخب
لأنو ضر بسمعته لابو شاكر

كلامك صحيح اخي

[احمدشاكول]

والله ياشباب الحق يقال ابو شاكر مدرب ناجح وليس له علاقة بما جرى

وانما السبب على القائمين على اتحاد الكرة وبالذات يلي اشو اسمو هادا التاج فارس الدين

واتاني سرحان والثالث نزار وته

يلي اجاهم الحسابات وقت التصفيات ياعيب الشوم على ناس ليس لهم علاقة بكرة القدم

وعذرا ابو شاكر انت انظف مدرب مرة على المنتخب

[Totti]

فعلا ابو شاكر ما غلط بمباراة ايران ... بس المشكلة بلاعبينا ...

حرام .. بالشوط الأول لعبو لعب مو طبيعي ...بس بالشوط التاني كان مبين عليهم التعب و لما أكلنا الغول الأول متل كأنو انصدمو وحسو بالعجز ... و فعلا ما عادو يعرفو شي اسمو لعب ...

يعني فينا نقول انو اذا ابو شاكر أحطأ بهالمباراة .. فهو أخطا من الجانب النفسي ... هاد موضوع كتير مهم كان لازم ينبه اللاعبين عليه ...

[HasSaN]

انا مع اغلب الشباب انو ابو شاكر عمل يلي عليه بس اللعيبة مدري شبون بس انا بتوقع غلطة ابو شكار انو كان بيقدر يعمل تشكلية افضل قبل المباراة خاصة لبعض اللاعبين : متل جهاد الحسين - بلحوس - الجنيات - علي دياب يلي رح يجلطني

ياشباب علي دياب من كم سنة وانا عم شوف اغلاطه نفسها وخاصة وقت التشتيت و استخلاص الكرة فايت بالحيط مع احترامي لبنية جسمه القوية و احيانا خشونته يلي عم تشفعله يكون ستوبر

[وحداوي برشاوي]

ياشباب والله ابو شاكر منيح وهو انسان محترم واذا بدنا نحكي الحق هو افضل مدرب بسوريا بس ابو شاكر كان الو اغلاط بمباراة الكويت بس بايران هو ماغلط لانو المنتخب كلو كان صفر ولو بدل كل اللاعبين مارح يستفيد لانو المستوى كان هابط من اللاعبين وابو شاكر شو بدو يعمل اذا كل اللاعبين كانو هيك
وانتا برايي انو ابو شاكر ورط حالو لانو لو كنت محلو مااقبل استلم المنتخب لانو لسه الجو مانو نضيف وبدو كتييير تاينضف

حيياك ييا اخي هاد الكلام و انا بتفق مع الشباب كمان

[ابو انس]

حيياك ييا اخي هاد الكلام و انا بتفق مع الشباب كمان

تسلم يااخي وهذا الحق اللي لازم نقولوا

[Totti]

علي دياب لاعب كتير مهم بالمنتخب ... صخي أحيانا عندو بعض الشتلات ... بس بيضل لاعب كبير ومالنا غنى عنو ... و بيضل من أفضل المدافعيين السوريين ... و على امل انو يتفادى أخطاؤو بالمباريات الجاية ...

[ronaldo-9]

ببساطة لاتحملوا الموضوع أكتر ما بيستاهل :
هاد منتخبنا وهي إمكانياتنا وهي لاعبينا .
مدرب ممتاز لاعبين قويين (عأساس) وهنن الأفضل بسورية .
يا أخي لازم نقتنع بشغلة وحده وهي طالما عندنا هيك مسؤولين رياضيين
فمالازم نحلم ولا حتى نفكر بالتأهل للدور التاني ,يعني طالما فيه ناس مبسوطة
بخسارتنا من الإتحاد الرياضي العام ,ومشجعين كمان مبسوطة لتثبت ان لاعبيها
اللي مالعبوا مع المنتخب هنن الأفضل ,وجمهور بيحضر المباراة وجايبلي علم ناديه عالملعب
ولما بيتسجل هدف بمرمانا بيفرحوا وبيسبوا وبرموا الحكام بالقناني الفاضية ,يعني ببساطة جمهور نتائج
خلونا نكون واقعيين شوي خسرنا مع إيران بسورية أمر جدا جدا جدا متوقع ومنطقي وأصلا
كان أكبر أمل عندي نطلع بنقطة التعادل بس ماحصلنا عليها ولاعبينا لعبوا مزبوط بشوط
ونسوا أنو المباراة تسعين دقيقة .
ببساطة ماحلنا لسا نتفاءل كتير اصبرولكم شوبة كالعادة لعل وعسى بعد شي خمسين سنة
يصير عندنا مسؤولين رياضيين بيهتموا شوية بشي اسمه منتخب سورية وقتها يمكن يكون عندنا شوية أمل

[Totti]

فعلا جمهورنا صاير بيقرف .ز و الله مو معقول اللي صار بمباراة ايران ...

يعني ليش رمي الزجاجات و العلب ومدري شو .. و الله عيب يا جماهة .. يعني الا ناكل عقوبة مرتبة من الاتحاد الاسيوي ... ما عجبتون عقوبة مباراة الامارات !!

[هنو]

اللاعبين يلي بيستاهلوا من الكرامة بالمنتخب هنن نفسون يلي هلأ بالمنتخب

بس لازم يكونوا احتياط و منون لازم يكون احتياط تاني



و اذا يا شباب عم تقواوا انو المدرب منيح بس اللعيبة خالصة

ما هي هية نفسا تقريباً لعيبتو يلي عم يجيبو نتائج بالنادي

ولا فابيو و السنغالي هنن يلي الون الدور الكبير ؟؟؟؟؟؟؟؟؟؟؟؟؟؟؟؟؟؟؟؟؟

[los merengues]

بسم الله الرحمن الرحيم
من جهتي انا لو مابعرف أن المباراة بدمشق كنت قلت أنها بطهران
وهيك بينت ع التلفزيون
خيرها بغيرها ... 2012

[ابو انس]

علي دياب لاعب كتير مهم بالمنتخب ... صخي أحيانا عندو بعض الشتلات ... بس بيضل لاعب كبير ومالنا غنى عنو ... و بيضل من أفضل المدافعيين السوريين ... و على امل انو يتفادى أخطاؤو بالمباريات الجاية ...



انا بخالفك وفي احسن وبكتيييييييير

[CANTONA]

هلا ليش انتو زعلانين ما بعرف

يلي بيسمعنا عم نحكي هالحكي بقول والله هدول من يوم يومن متعودين عالربح

وهل اجو خسروا

يا جماعة لا تزعلوا ولا شي

هي حدودنا ومن يوم يومنا هيك وجلدنا تمسح وهاللخد تعود عاللطم

كل مرة منحمل الخطل لحدل مرة للمدرب ومرة للاعبين ومرة للاتحاد ومرة لما بعرف مين

حاج والله قرفن الرياضة كلها

مالي زعلان انا غير على جمهورنا المعتر الساذج

يلي بيقرا كلمات هالصحفيين الجربانين وبينشحن عالملعب متل الجدبان

وهنن قاعدين عم ياكلوا بعقلنا حلاوة كيف ما كانوا

أنا بهالتصفيات زعلت على شغلتين

أولها على لعيبتنا المحترفين يلي عم يعضوا أصابعهن ندم على هالجية المشرشحة وعلى اللعب لهيك منتخب

تاني شي على أبو شاكر الانسان (وليس المدرب) لأنو أبو شاكر انسان خلوق ورائع وما حبيتلو هالبهدلة

بالنسبة لمين اخطأ وليش خسرنا وما بعرف شو فبقول انو كل مين إلو رأي وكل الآراء صحيحة

[Totti]

أنا بهالتصفيات زعلت على شغلتين

أولها على لعيبتنا المحترفين يلي عم يعضوا أصابعهن ندم على هالجية المشرشحة وعلى اللعب لهيك منتخب

تاني شي على أبو شاكر الانسان (وليس المدرب) لأنو أبو شاكر انسان خلوق ورائع وما حبيتلو هالبهدلة

بالنسبة لمين اخطأ وليش خسرنا وما بعرف شو فبقول انو كل مين إلو رأي وكل الآراء صحيحة


ليش عم تحكي وكأننا طلعنا من التصفيات !! لسا يا أخي الأمل كبير انشالله ... و اللي قاز عالكويت بيفوز عالامارات مو هالشغلة الصعبة ... بس المهم نحافظ عالأمل ...

أما أبو شاكر .. فهو فعلا انسان أكتر راقي ... بس ما عم يتوفق لأن في مين عم يخفرلو من ورا ...

[ANWAR1986]

لاتعليق ..........................

[ابو انس]

ليش عم تحكي وكأننا طلعنا من التصفيات !! لسا يا أخي الأمل كبير انشالله ... و اللي قاز عالكويت بيفوز عالامارات مو هالشغلة الصعبة ... بس المهم نحافظ عالأمل ...



أما أبو شاكر .. فهو فعلا انسان أكتر راقي ... بس ما عم يتوفق لأن في مين عم يخفرلو من ورا ...

وانت عم تحكي من كل عقلك

[CANTONA]

ليش عم تحكي وكأننا طلعنا من التصفيات !! لسا يا أخي الأمل كبير انشالله ... و اللي قاز عالكويت بيفوز عالامارات مو هالشغلة الصعبة ... بس المهم نحافظ عالأمل ...

أما أبو شاكر .. فهو فعلا انسان أكتر راقي ... بس ما عم يتوفق لأن في مين عم يخفرلو من ورا ...


لك انو أمل يا زلمة بربك هاد فريق بدك تقابل فيو أستراليا وكوريا واليابان وهالشلة

على شو بدك تتأهل على تعادل مع خيال المنتخب الايراني في ايران وتعادل مضحك مع الامارات بالشام

ولا عالفوز اليتيم على الكويت بهدف شغل الله

بغض النظر عن المشاعر والعواطف ايران والامارات بيستاهلو التاهل اكتر مننا

[HasSaN]

بغض النظر عن المشاعر والعواطف ايران والامارات بيستاهلو التاهل اكتر مننا

هون بيت القصيد .... و المنطق بقول هيك واذا تاهلنا مابنستاهل هاد التأهل طبعا حسب مستوى بالمباريات الماضية

[ronaldo-9]

ياعيني عليك ياكانتونا كلامك كله سليم وصحيح وبوافقك بكل شي قلته .
للشباب اللي لسا عندهم ذرة أمل نصيحة انسوها وأنا كمشجع سابق للمنتخب رح ارضا بنقطة التعادل
بالإمارات ,بس المسخرة انو فيه عالم عندها أمل نفوز عالإمارات 3-0 ونتأهل

[Totti]

يا جماعة مو شرط انو نكون عم نفوز من أول التصفيات لهلأ لحتى نتأهل .. بيكفي مباراة وحدة تلعبها و تحسبها صح لحتى تتأهل ... و هالمباراة اجت على ايديها و رجليها ... صحيح انو المهمة صعبة .. بس هاد ما بيمنع انو رح نتأهل باذن الله ...

اما مشان استراليا و اليابان .. هاد الحكي سابق لأوانو ... و بكير من هلأ نفكر بهيك شغلات ...

و بالنسبة الي انا متفائل كتير انو نربح واحد صفر ... (يمكن انا الوحيد اللي بسوريا متفائل ) بس منتواجه بعد المباراة ... :d

[shumi]

صرنا اتنين ابو التوت

وانا متفائل انو مو بس رح نربح ورح تاهل ان شاء الله

وقولي الله سوريا